Udhëtim 2 ditor në Voskopojë

Udhëtim 2 ditor në Voskopojë – 6200 Lekë / 68 Euro

2 Ditë / 1 Natë në Ura e Kovacit Resort & Agrotourism

Largohuni nga zhurma e qytetit dhe dhurojini vetes një fundjavë plot qetësi, natyrë dhe relaks në zemrën e juglindjes së Shqipërisë. Voskopojë, me historinë e saj unike dhe peizazhet mahnitëse, së bashku me mikpritjen e ngrohtë të Ura e Kovacit Resort & Agrotourism, krijojnë kombinimin ideal për një eksperiencë të paharrueshme.

Ky program është menduar për ata që duan të eksplorojnë vende autentike, të shijojnë gastronominë tradicionale, ajrin e pastër malor dhe komoditetin e një resorti modern në mes të natyrës.

Dita 1 | Tiranë – Elbasan – Pogradec – Tushemisht – Drilon – Voskopojë – Ura e Kovacit Resort

Udhëtimi ynë nis në orët e para të mëngjesit drejt juglindjes së Shqipërisë, duke përshkuar peizazhe të bukura malore dhe brigjet e Liqenit të Ohrit.
Ndalesa e parë do të jetë në Pogradec, ku do të kemi kohë për një shëtitje të këndshme në shëtitoren buzë liqenit dhe për të shijuar panoramën e mrekullueshme.

Më pas vazhdojmë drejt Tushemishtit, fshatit piktoresk që u bë i famshëm nga filmi shqiptar “Zonja nga Qyteti”. Do të vizitojmë shtëpinë e njohur si “Shtëpia e Teto Ollges”, do të shëtisim në rrugët e qeta të fshatit dhe do të shijojmë atmosferën karakteristike që e bën këtë vend një nga destinacionet më të dashura në bregun e Liqenit të Ohrit.

Vetëm pak minuta më tej ndodhet Driloni, një nga perlat natyrore të Shqipërisë, i njohur për burimet kristalore, kanalet e qeta dhe gjelbërimin e pasur. Këtu do të keni kohë të lirë për drekë në një nga restorantet karakteristike të zonës, me pamje drejt parkut dhe liqenit.

Pas drekës vazhdojmë drejt Voskopojës, një prej fshatrave më historikë dhe më autentikë të Shqipërisë. Do të shëtisim në qendrën historike, do të vizitojmë kishat shekullore dhe do të zbulojmë historinë e pasur të këtij destinacioni, i cili dikur ishte një nga qendrat më të rëndësishme kulturore dhe ekonomike të Ballkanit.

Pasdite mbërrijmë në Ura e Kovacit Resort & Agrotourism, ku do të akomodohemi dhe do të kemi kohë të lirë për të shijuar ambientet e resortit, natyrën dhe fermën agroturistike.

Në mbrëmje do të shijojmë një darkë tradicionale të shoqëruar me muzikë live dhe një atmosferë të ngrohtë, duke e mbyllur ditën me relaks dhe argëtim.

Dita 2 | Relaks në Resort – Korçë – Elbasan – Tiranë

Mëngjesi fillon mes qetësisë së natyrës dhe ajrit të pastër të zonës. Pas mëngjesit do të keni kohë të lirë për të shijuar gjithçka që ofron resorti.

Mund të shëtisni në ambientet e gjelbëruara, të vizitoni fermën agroturistike, të kaloni kohë me kafshët e fermës, të realizoni fotografi në peizazhet malore ose thjesht të relaksoheni duke shijuar qetësinë dhe mikpritjen karakteristike të resortit.

Më pas nisemi drejt Korçës, qytetit të serenatave dhe një prej qyteteve më elegante në Shqipëri. Do të shëtisim në Pazarin e Vjetër, në qendrën historike dhe do të keni kohë të lirë për një kafe, drekë ose pazar në atmosferën karakteristike korçare.

Pas vizitës në Korçë, nisemi drejt Elbasanit dhe Tiranës, duke mbyllur një fundjavë të mbushur me natyrë, histori, traditë dhe momente relaksi që do të mbeten gjatë në kujtesë.