Mali i Rrencit: Një Eksperiencë në Hiking

Në udhëtimin e rradhës kemi menduar për të gjithë të apasionuarit pas hiking, por edhe për ata që pëlqejnë të provojnë eksperienca të reja. Hiking në Malin e Rrencit, një masiv malor mes Shëngjinit dhe Velipojës rreth 387 m mbi nivelin e detit. Një ecje nëpërmjet së cilës do të njiheni jo vetëm me natyrën e zonës, por edhe me elemente nga historia dhe kultura.

Rrugëtimi fillon nga Shëngjini, një plazh dhe port mjaft i njohur i Shqipërisë. Duke vazhduar ngjitjen për në malin e Rrencit do të filloni të shikoni pamjen që bëhet më e bukur me çdo hap që ju hidhni. Gjatë ecjes nëpër pyll vihet re bimësia e larmishme e zonës mes së cilës gjenden edhe bimë medicinale. Përgjatë gjithë hiking, nëse hidhni shikimin poshtë, do të vini re se po shoqëroheni nga kaltërsia e detit Adriatik. Nëse dëshironi mund të pushoni nëpër livadhe. Në vazhdim të rrugës, do t’i afroheni gjithnjë e më shumë një tjetër plazhi të njohur për bukurinë e tij, Rana e Hedhun. Duke vazhduar drejt majës së malit të Rrencit, përpara jush do të shfaqet një peizazh që fillon nga Kepi i Rodonit e deri në Ulqinin e Malit të Zi. Një arratisje në natyrë që me të vërtetë do t’ju mbushi me energji pozitive.

Mjaft interesante janë edhe objektet që do të hasni rrugës, të cilat kanë një rëndësi të veçantë për historinë e vendit tonë. Një prej tyre është kisha 600-vjeçare e Shën Nikollit, e cila u rindërtua nga banorët e zonës gjatë shekullit XVII. Gjithashtu, gjenden edhe rrënojat e kishës së Shën Pjetrit. Diçka tjetër që mund të ndeshni gjatë hiking, janë edhe tumat piramidale me origjinë ilire me një vjetërsi prej rreth 3500 vitesh. Për adhuruesit e hitorisë është një udhëtim që jep mundësinë e një kombinimi të mrekullueshëm me natyrën dhe aktivitetin fizik.

Klikoni këtu për të zgjedhur Hiking në Malin e Rrencit.