Udhëtim në Korenë e Jugut – Seoul, Busan dhe Thesaret e Historisë Koreane

Udhëtim në Korenë e Jugut

Dita 1 – Nga Tirana në Seoul

Do të takoheni me guidën rreth orës 03:00 në aeroport. Nisja nga Tirana në orën 06:10. Udhëtojmë drejt Frankfurtit, mbërrijmë në orën 08:35. Marrim fluturimin për Incheon në orën 15:35.

Dita 2 – Mirë se vini në Seoul, zemra moderne e Koresë së Jugut

Pas mbërritjes në Aeroportin Ndërkombëtar të Incheon-it në orën 09:55, pas procedurave të pasaportës, kontrollit doganor dhe marrjes së bagazheve, do të takohemi me guidën tonë anglishtfolëse në zonën e mbërritjeve. Guida do të na mirëpresë dhe do të na shoqërojë drejt automjetit privat për transferimin në qendër të Seoul-it.

Pasi të mbërrijmë në qytet, do të nisim njohjen e parë me kryeqytetin përmes një shëtitjeje në zonën e  Myeongdong, një nga lagjet më të njohura të Seoul-it për shopping, kozmetikë koreane, modë, ekrane gjigante ndriçuese dhe atmosferë urbane. Kjo zonë është veçanërisht e dashur për vizitorët që duan të ndiejnë menjëherë energjinë moderne të Koresë së Jugut.

A e dini se? Myeongdong konsiderohet si një nga qendrat kryesore të trendit K-beauty, ku shumë marka koreane të kozmetikës prezantojnë produktet e tyre më të fundit përpara se të bëhen të njohura në tregjet ndërkombëtare.

Më pas do të kthehemi në hotel për check-in dhe kohë të lirë për pushim. Në mbrëmje, konsumojmë darkën në një restorant lokal.

Akomodimi në Nine Tree by Parnas Seoul Myeongdong II 4*.

Dita 3 – Seoul mes pallateve mbretërore, traditës dhe shijeve të rrugës

Pas mëngjesit në hotel, do të takohemi me guidën në hollin e hotelit dhe do të nisim një ditë të plotë eksplorimi në Seoul. Kjo ditë është menduar për të na futur më thellë në historinë, kulturën dhe jetën e përditshme të kryeqytetit korean.

Vizita jonë nis me Gyeongbokgung Palace, pallati më i madh dhe një nga më të bukurit ndër pesë pallatet mbretërore të dinastisë Joseon. I ndërtuar fillimisht në vitin 1395, ky pallat ka shërbyer si rezidenca kryesore mbretërore dhe sot mbetet një nga simbolet më të rëndësishme të trashëgimisë koreane. Gjatë vizitës mund të kemi mundësinë të ndjekim edhe ceremoninë tradicionale të ndërrimit të rojeve, një moment shumë fotozhenik dhe i veçantë për vizitorët.

A e dini se? Emri “Gyeongbokgung” mund të përkthehet si “Pallati i Bekuar nga Qielli”, një emër që pasqyron rëndësinë politike dhe shpirtërore që ai kishte për mbretërinë Joseon.

Më pas do të vazhdojmë drejt Bukchon Hanok Village, një lagje tradicionale ku shtëpitë koreane “hanok” ruhen ende mes ndërtesave moderne të Seoul-it. Përpara se të nisim përvojën kulturore, do të veshim Hanbok, kostumin tradicional korean, për ta përjetuar atmosferën në mënyrë më autentike.

Në vijim, do të marrim pjesë në një ceremoni tradicionale çaji, e njohur në Kore si “darye”, që do të thotë “etiketa e çajit”. Në kulturën koreane, pirja e çajit nuk është thjesht një zakon, por një përvojë që përfshin qetësinë, përqendrimin dhe harmoninë e shqisave.

Dreka do të jetë e lirë.

Pasdite, do të eksplorojmë Insadong, një nga lagjet më artistike dhe kulturore të Seoul-it. Rrugicat e saj janë të mbushura me galeri arti, dyqane antikash, artizanat tradicional, çajtore dhe suvenire koreane. Kjo zonë është ideale për ata që duan të blejnë diçka autentike dhe të ndiejnë atmosferën kulturore të qytetit.

Në fund të ditës, do të ngjitemi në N Seoul Tower, një nga ikonat më të njohura të Seoul-it, prej nga hapet një panoramë e mrekullueshme mbi qytet. Nga lart, Seoul shfaqet si një metropol i gjallë, ku ndërtesat moderne, kodrat dhe dritat e qytetit krijojnë një pamje mbresëlënëse.

Mbrëmja do të vazhdojë në Gwangjang Market, një nga tregjet më të njohura të ushqimit tradicional në Seoul. Ky treg është i famshëm për atmosferën e tij autentike dhe për ushqimet koreane të rrugës, ku mund të provojmë specialitete si barbecue koreane, birra lokale dhe ëmbëlsira tradicionale me oriz dhe fasule të ëmbla.

A e dini se? Gwangjang Market është një nga tregjet më të vjetra tradicionale të Seoul-it dhe sot është një nga vendet më të dashura për të provuar ushqimin real korean, ashtu siç e konsumojnë vendasit.

Akomodimi në Nine Tree by Parnas Seoul Myeongdong II 4*.

Dita 4 – Gyeongju, muzeu i hapur i historisë koreane

Pas mëngjesit, do të udhëtojmë me trenin e shpejtësisë së lartë KTX drejt Gyeongju-t, një nga qytetet më të rëndësishme historike të Koresë së Jugut. Udhëtimi zgjat rreth 2 orë dhe na çon drejt asaj që shpesh quhet “muzeu pa mure” i Koresë.

Gyeongju ka qenë dikur kryeqyteti i Mbretërisë Silla dhe është një destinacion i jashtëzakonshëm për ata që duan të kuptojnë rrënjët historike dhe shpirtërore të vendit.

Vizita jonë nis me Bulguksa Temple, një nga tempujt më të rëndësishëm budistë të Koresë dhe pjesë e Trashëgimisë Botërore të UNESCO-s. Ky tempull përfaqëson mjeshtërinë arkitekturore të periudhës Silla dhe është konsideruar një nga shembujt më të bukur të artit budist korean. Së bashku me Seokguram Grotto, ai formon një kompleks fetar me rëndësi të jashtëzakonshme historike dhe kulturore.

Më pas do të vizitojmë Seokguram Grotto, një shpellë-tempull e ndërtuar në shekullin VIII në shpatet e malit Toham. Brenda saj ndodhet një statujë monumentale e Budës, e drejtuar nga deti, e rrethuar nga figura hyjnore të gdhendura me finesë të jashtëzakonshme. UNESCO e përshkruan këtë vend si një kryevepër të artit budist në Lindjen e Largët.

A e dini se? Seokguram Grotto nuk është një shpellë natyrore e thjeshtë; ajo është ndërtuar me një teknikë të veçantë arkitekturore dhe gjeometrike, duke e bërë një arritje të jashtëzakonshme inxhinierike për kohën e saj.

Dreka do të jetë e lirë.

Pasdite do të shëtisim në Tumuli Park, një park i mbushur me varre mbretërore të periudhës Silla. Këto kodra të gjelbërta fshehin brenda tyre histori mbretërish, familjesh aristokrate dhe thesare arkeologjike. Do të vizitojmë edhe varrin e njohur si “Heavenly Horse Tomb”, ku gjatë gërmimeve arkeologjike janë zbuluar objekte të çmuara që tregojnë nivelin e lartë artistik dhe kulturor të mbretërisë Silla.

Më pas do të ndalemi pranë varreve të Noseo-dong dhe do të vizitojmë Cheomseongdae Tower, observatori më i vjetër astronomik në Lindjen e Largët, i ndërtuar në vitin 634. Këtu, astronomët mbretërorë studionin lëvizjen e yjeve dhe parashikonin eklipset diellore e hënore.

A e dini se? Cheomseongdae konsiderohet një nga strukturat më të vjetra astronomike ende të ruajtura në Azi, duke treguar se shkenca dhe astronomia kishin një rol të rëndësishëm në jetën mbretërore koreane.

Në mbrëmje, do të konsumojmë darkën në një restorant lokal ku do të shijojmë një pjatë të veçantë të zonës, Gyeongju Soondubu, një variant lokal i supës së njohur koreane me tofu të butë.

Akomodimi në The K Hotel Gyeongju 4*. 

Dita 5 – Busan, qyteti bregdetar i tregjeve, tempujve dhe artit urban

Pas mëngjesit, do të udhëtojmë drejt Busan, qyteti i dytë më i madh i Koresë së Jugut dhe një nga portet më të rëndësishme të vendit. Busan është një destinacion që kombinon detin, tregjet tradicionale, kulturën urbane dhe pamjet panoramike.

Me të mbërritur, do të vizitojmë Haedong Yonggungsa Temple, një tempull budist i vendosur pranë bregdetit. Ndryshe nga shumë tempuj të tjerë koreanë që ndodhen në male, ky tempull ka një pozicion shumë të veçantë pranë detit, duke krijuar një pamje të rrallë dhe shumë mbresëlënëse.

Më pas do të shëtisim në Jagalchi Market, tregu më i madh i peshkut dhe frutave të detit në Kore. Ky është një nga vendet më autentike për të ndier jetën e përditshme të Busan-it, me stenda të mbushura me peshk të freskët, molusqe, kallamarë dhe produkte të tjera deti.

Dreka do të jetë e lirë.

Pasdite do të vizitojmë Bosu-dong Book Street, një rrugë e veçantë librash me histori të lidhur me periudhën pas çlirimit të Koresë. Libraritë nisën të hapeshin një nga një, dhe me kalimin e kohës kjo zonë u kthye në një rrugë të njohur për libra të përdorur, libra të vjetër dhe atmosferë nostalgjike.

Më pas do të ndalemi në BIFF Square, një zonë e njohur për shopping, street food dhe historinë e saj të lidhur me Festivalin Ndërkombëtar të Filmit në Busan.

Në vijim do të vizitojmë Yongdusan Park, ku ndodhet edhe Busan Tower, me lartësi 118 metra. Nëse moti është i kthjellët, nga këtu mund të shohim një pamje të bukur të qytetit dhe të portit, duke kuptuar më mirë rëndësinë ekonomike dhe detare të Busan-it.

Dita do të përmbyllet me Gamcheon Culture Village, një nga zonat më fotogjenike të Busan-it. Ky fshat i ndërtuar në shpatet e kodrës është i njohur për shtëpitë shumëngjyrëshe, rrugicat e ngushta, muralet, instalacionet artistike dhe atmosferën kreative. Visit Korea e përshkruan Gamcheon si një vend me rrugica të ngushta dhe shtëpi të vendosura në tarraca, të cilat i japin zonës një karakter shumë të veçantë.

A e dini se? Gamcheon Culture Village shpesh quhet “Santorini i Koresë” për shkak të shtëpive të vendosura në nivele të ndryshme dhe ngjyrave të gjalla që mbulojnë kodrën.

Në mbrëmje, konsumojmë darkën në një restorant lokal.

Akomodimi në L7 Haeundae 4*.

Dita 6 – Qetësia e kopshteve koreane dhe legjenda romantike e Namwon-it

Pas mëngjesit, do të nisemi drejt Damyang, një zonë e vendosur në perëndim të gadishullit korean, e njohur për natyrën, bambunë dhe atmosferën e qetë tradicionale. Udhëtimi zgjat rreth 3 orë.

Në Damyang do të vizitojmë Soswaewon Garden, një kopsht tradicional korean i ndërtuar në shekullin XVI gjatë dinastisë Joseon. Ky kopsht është një shembull i bukur i harmonisë mes arkitekturës, natyrës dhe filozofisë koreane. Mes pyjeve të bambusë dhe ambienteve të qeta, do të kemi mundësinë të përjetojmë një moment relaksi larg ritmit të qyteteve të mëdha.

A e dini se? Kopshtet tradicionale koreane nuk synojnë të dominojnë natyrën, por të bashkëjetojnë me të. Ato projektohen në mënyrë që ndërtesat, uji, pemët dhe gurët të duken si pjesë natyrale e të njëjtit peizazh.

Dreka do të jetë e lirë.

Pasdite do të vazhdojmë drejt Namwon, një qytet i njohur për historinë, kulturën dhe legjendat romantike koreane. Këtu do të vizitojmë Gwanghallu Pavilion, një pavijon i ndërtuar në shekullin XV dhe i restauruar në shekujt pasues.

Ky vend është bërë i famshëm përmes historisë epike të dashurisë mes një të riu fisnik dhe një vajze “kisaeng”, një figurë kulturore që shpesh krahasohet me geishat japoneze për rolin e saj artistik dhe shoqëror.

A e dini se? Gwanghallu lidhet me historinë klasike koreane të dashurisë “Chunhyangjeon”, një nga tregimet më të njohura në letërsinë tradicionale koreane, shpesh e përshtatur në filma, drama dhe shfaqje teatrale.

Në mbrëmje, bëjmë check-in në hotel dhe konsumojmë darkën në një restorant lokal.

Akomodimi në Hanok Stay Namwonyechon by Kensington 4*.

Dita 7 – Fshatra tradicionale, fortesë UNESCO dhe darka e lamtumirës

Udhëtim në Korenë e Jugut hyn ne diten e 7. Pas mëngjesit, do të udhëtojmë drejt Jeonju, një nga qytetet më të dashura për kulturën tradicionale koreane. Këtu do të shëtisim në Jeonju Hanok Village, një lagje e bukur me rreth 800 shtëpi tradicionale koreane “hanok”, të ruajtura me kujdes ndër vite.

Gjatë shëtitjes në rrugicat e ngushta, do të admirojmë çatitë karakteristike me tjegulla të harkuara, strukturat prej druri dhe detajet elegante arkitekturore që e bëjnë këtë zonë një nga vendet më autentike për të njohur trashëgiminë koreane.

A e dini se? Jeonju konsiderohet edhe si një nga kryeqytetet gastronomike të Koresë së Jugut dhe është veçanërisht i famshëm për bibimbap, një nga pjatat më të njohura koreane.

Më pas do të vizitojmë Gyeonggijeon Shrine, një vend historik ku ruhet portreti i Mbretit Taejo, themeluesit të dinastisë Joseon. I rrethuar nga pemë të vjetra dhe shtigje të qeta, ky vend ofron një atmosferë të qetë dhe një lidhje të drejtpërdrejtë me historinë mbretërore të Koresë.

Pas vizitës, do të kemi kohë të lirë për të eksploruar zonën, për të ndaluar në çajtore tradicionale ose për të blerë suvenire artizanale.

Dreka do të jetë e lirë.

Në vijim do të udhëtojmë drejt Suwon, ku do të vizitojmë Hwaseong Fortress, një nga strukturat më të mëdha ushtarake të Koresë së Jugut dhe pjesë e Trashëgimisë Botërore të UNESCO-s. E ndërtuar gjatë dinastisë Joseon, kjo fortesë është një shembull i jashtëzakonshëm i arkitekturës ushtarake dhe planifikimit urban të kohës.

A e dini se? Hwaseong Fortress u ndërtua jo vetëm për mbrojtje, por edhe si pjesë e një vizioni më të gjerë mbretëror për një qytet të planifikuar mirë, duke kombinuar funksionin ushtarak me estetikën dhe organizimin urban.

Më pas do të kthehemi në Seoul.

Në mbrëmje, do të shijojmë një darkë lamtumire në një restorant të përzgjedhur, një moment i bukur për të rikujtuar eksperiencat, qytetet, shijet dhe pamjet që kemi zbuluar gjatë udhëtimit tonë në Korenë e Jugut.

Akomodimi në Nine Tree by Parnas Seoul Myeongdong II 4*

Dita 8 – Lamtumirë

Pas mëngjesit në hotel, do të bëjmë check-out dhe do të transferohemi drejt aeroportit për fluturimin e kthimit.

Ky udhëtim përmbyllet me kujtime nga një Kore e Jugut plot kontraste: pallate mbretërore dhe kulla moderne, tempuj të qetë dhe tregje plot jetë, fshatra tradicionalë dhe qytete dinamike. Një eksperiencë që na afron me historinë, kulturën, gastronominë dhe shpirtin mikpritës të një prej destinacioneve më të veçanta të Azisë.

Udhëtim në Korenë e Jugut