Udhëtim në Dubrovnik, Krka, Split dhe Relaks në Medora Auri Resort – 3 Ditë – 175€

Itinerari

Dita 1: Udhëtimi drejt Adriatikut – Nga Shqipëria në Kroaci me ndalesë në Tivat

Udhëtimin tonë e nisim herët në mëngjes, në orën 5 nga Elbasani dhe 6 nga Tirana, të përgatitur për një aventurë të paharrueshme drejt brigjeve të Adriatikut. Pasi bashkohemi me grupin dhe stafin shoqërues, lëmë pas Elbasanin dhe Tiranën për të hyrë në territorin piktoresk të Malit të Zi. Pas disa orësh udhëtim mes peizazheve bregdetare dhe malore, ndalojmë për një shëtitje në Porto Montenegro, një nga portet më luksoze në rajon. Jahtet elegante, butiket dhe kafet me pamje nga marina krijojnë një fryme relaksuese pushimesh.

Më pas kemi një kalim të shkurtër por shumë të këndshëm me traget nga Lepetane në Kamenari, ku deti, ajri i freskët dhe panorama e gjirit na japin një dozë magjie mesdhetare.

Gjatë rrugës bëjmë ndalesën e rradhës tek Ura Franjo Tuđman, mbi Dubrovnik, ku kemi mundësi të shikojmë pamje panoramike dhe të bëjmë foto, vazhdojmë rrugën përgjatë bregdetit në itinerarin Neum, Ploce, Neretva, Bacinska Jezera dhe Makarska Rivijera.

Mbrëmja na gjen në Podgora, Kroaci, ku akomodohemi në Medora Auri Family Beach Resort, një kompleks modern buzë detit, i krijuar për t’u çlodhur dhe për të shijuar luksin në mënyrën më komode. Pas një darke të këndshme, kemi kohë për të shijuar detin, resortin dhe qetësinë që ai ofron.

Dita 2: Magjia e natyrës në Parkun Kombëtar Krka dhe Split

Pas një mëngjesi të këndshëm me pamje nga deti, nisim ditën me një vizitë në një nga mrekullitë natyrore të Kroacisë – Parkun Kombëtar Krka. I njohur për ujëvarat spektakolare dhe rrugicat e gjelbërta, ky park na ofron një përvojë që ndërlidh qetësinë, bukurinë dhe energjinë natyrore. Ecim pranë ujërave të kristalta, dëgjojmë cicërimat e zogjve dhe shijojmë një ndjesi të rrallë harmonie me natyrën.

Pas disa orësh në park, kemi mundësinë të relaksohemi dhe të shijojmë një drekë në afërsi të zonës.

Udhëtimi ynë vazhdon drejt Splitit, një qytet historik dhe një nga perlat e Adriatikut. Shëtisim në zemrën e qytetit të vjetër, ku Kalaja e Dioklecianit na çon pas në kohë, në epokën romake. Rrugicat me kalldrëm, ndërtesat historike dhe riviera plot jetë na ofrojnë një përzierje perfekte të historisë dhe modernitetit.

Pasditja mbyllet me rikthimin në Podgora, ku na pret një tjetër darkë relaksuese në Medora Auri Resort, në përgatitje për ditën e fundit të këtij udhëtimi të jashtëzakonshëm.

Dita 3: Dubrovniku i paharrueshëm dhe kthimi në Shqipëri

Pasi përshëndetemi me resortin dhe bëjmë check-out, nisim rrugën drejt një nga qyteteve më mbresëlënëse të Ballkanit – Dubrovnikut. I njohur si “Perla e Adriatikut”, ky qytet mesjetar i rrethuar nga mure madhështore të çon në një tjetër botë. Bëjmë një ndalesë panoramike në Ura Pelješac, një vepër moderne që ofron pamje fantastike drejt bregdetit kroat, dhe më pas eksplorojmë rrugën e famshme Stradun, kalatë, portat mesjetare dhe kafetë tradicionale me pamje nga deti.

Pas kësaj vizite mbresëlënëse, nisim udhëtimin e kthimit drejt Shqipërisë, duke ndalur herë pas here për pushime të shkurtra dhe pamje panoramike. Kalimi me traget nga Kamenari në Lepetane është një tjetër moment për të shikuar bukurinë e brigjeve që lëmë pas.

Mbrëmja na gjen sërish në atdhe, të lodhur por të mbushur me kujtime të paharrueshme nga tre ditë udhëtim që bashkuan natyrën, historinë, relaksin dhe emocionin.